Liefde groet

Liefde se ware eienskappe is wat uiteindelik ’n diepe en blywende indruk op mense maak.

In 1 Korintiërs 13 beskryf Paulus liefde as iets wat nie probeer beïndruk nie, maar juis indrukke los deur opregtheid, geduld, goedhartigheid en nederigheid.

Ware, egte liefde in ons word gesien deur wat ons doen, nie deur hoe ons spog nie – en dít raak Abba Vader en ander mense se harte.

Hoe ons mekaar behandel is vir Abba Vader baie belangrik. Hy wil hê ons moet gevul wees met Hom, en dit sal gesien word in ons vrug: liefde, blydskap, vrede, lankmoedigheid, vriendelikheid, goedheid, getrouheid, sagmoedigheid en selfbeheersing (volgens Gal. 5:22).

Die manier waarop ons mekaar as kinders van Abba Vader en ander groet, kan dus vir ons onbelangrik lyk, maar hierdie skynbaar nietige kwessie het verbasend groot betekenis.

Hoe groet jy as ’n dissipel?

Jy kan baie te wete kom oor hoe dissipels van Yeshua mekaar groet. Daarom sê Petrus in 1 Petrus 5:14: “Groet mekaar met ’n soen van Christelike liefde.” Nou dit beteken nie as jy by die kerk kom, soen almal nie. Nee, Petrus verwys na ’n kulturele gebruik van daardie tyd waar mense mekaar met ’n soen op die wang of voorkop gegroet het.

Dis ’n teken van nabyheid, aanvaarding en liefde – soortgelyk aan hoe kinders van Abba Vader mekaar vandag groet met ’n warm drukkie of handdruk.

Maar Petrus gee dit ’n geestelike betekenis:

Hy sê nie net “groet mekaar vriendelik” nie, maar doen dit in liefde wat uit Yeshua kom – opreg, rein, eerbiedig en sonder valsheid.

’n Soen in Yeshua is ’n uitdrukking van broederlike of susterlike liefde in die liggaam van Yeshua. Dis ’n manier om te sê: “Jy is deel van die familie van Abba Vader. Jy is ’n Koninkrykskind met ’n doel, en ek eer jou as my broer of suster in Yeshua.”

’n Groet wat Familie in Yeshua Bevesti

Onthou, terwyl Yeshua met ’n skare praat op ’n tyd, sê iemand vir Hom: “Jou moeder en jou broers staan buite en wil met U praat.” Yeshua antwoord in Matteus 12:48–50: “Wie is my moeder? En wie is my broers?” En Hy steek Sy hand oor Sy dissipels uit en sê: “Dáár is my moeder en my broers. Want elkeen wat die wil doen van my Vader wat in die hemele is, dié is my broer en suster en moeder.”

Yeshua verwerp nie Sy aardse familie nie, maar Hy leer ’n dieper geestelike waarheid: Abba Vader se familie is nie net volgens bloed nie, maar volgens gehoorsaamheid aan Abba Vader se wil. Yeshua sê in wese: “Die mense wat My Vader se wil doen, is werklik na aan My – hulle is My familie.”

Yeshua leer ons as Sy dissipels: Jy word deel van Sy familie deur gehoorsaamheid en geloof. Gemeenskap in Yeshua is diep, geestelik en ewigdurend – dikwels selfs nader as aardse familieverhoudings.

Daarom sê Petrus: Groet mekaar met opregte, liefdevolle warmte wat wys dat jy die ander persoon as deel van Abba Vader se familie sien. 

Laat elke groet eerbied, respek en Yeshua-liefde uitstraal – of dit ’n drukkie, handdruk, glimlag of ’n vriendelike woord is.

Hierdie klink dalk vir jou soos ’n klein saak of iets onbelangriks, maar die Woord sê meer hieroor as wat ’n mens verwag. Paulus moedig ons aan om mekaar hartlik te groet wanneer ons ontmoet. In Romeine 16:16 sê hy: “Groet mekaar met ’n heilige kus. Al die gemeentes van Yeshua groet julle.” Dan in 1 Korintiërs 16:20 sê hy: “Groet mekaar met ’n heilige kus.”

Ook aan die einde van sy brief aan die Romeine vra hy medegelowiges om 27 van sy vriende en geliefdes namens hom te groet. Hy noem selfs elkeen se naam. Dit gaan egter nie net oor jou vriende nie.

In Yeshua se Bergrede, toe Hy Sy dissipels leer oor dissipelskap, sê Yeshua dat selfs heidene vriendelik is met mense van wie hulle hou. Dit is vir enigeen maklik om dit te doen. Hy neem dit egter ’n stap verder en sê om godvresend te wees, beteken om nederig en hoflik genoeg te wees om selfs jou vyande met vriendelikheid aan te spreek.

Die krag van ’n opregte groet

Hoe groet jy jou vriende, kollegas en bure? Wat van kennisse en mense wat jy in die openbaar ontmoet? Jy loop dalk iemand raak van wie jy nie noodwendig hou nie, maar uit hoflikheid groet jy hulle tog. As jy dus so vriendelik en hoflik teenoor ander mense is, verdien kinders van Abba Vader en mense saam met jou in die kerk nie dieselfde nie?

Wanneer jy opreg wys dat jy bly is om iemand te sien, kan dit hul dag beter maak. Ja, ’n eenvoudige, opregte welkom kan iemand se dag ophelder.

Wanneer iemand kommunikeer dat hulle bly is om jou te sien, neem jou persoonlike gevoel van eiewaarde toe. Jy voel belangriker en meer gewaardeer.

Dit is omdat ’n hartlike groet die atmosfeer skep vir positiewe en gesonde interaksie.

Dink aan die verhaal wat Yeshua oor die verlore seun vertel het. Hierdie jongman het daarop aangedring om sy erfporsie te kry en het dit toe op ’n dwase lewenstyl gemors. Sy slegte keuses het hom egter vinnig ingehaal, en hy moes in ’n varkhok oorskietkos eet. Hierdie jongman was skaam en het sy verskoning geoefen in die varkhokke, en gewonder hoe hy sy pa in die oë gaan kyk as hy terugkom huis toe. Maar sy pa het hom glad nie op die manier gegroet wat hy verwag het nie.

Nee, Lukas 15:20 sê: “Toe hy nog ver aankom, het sy pa hom al gesien en hom innig jammer gekry. Hy het na hom gehardloop, hom omhels en gesoen.”

Van al die scenarios waaraan hierdie jongman kon dink, was dit die een wat hy die minste verwag het. Maar hoe dink jy het dit hom laat voel toe sy pa hom omhels en met dankbaarheid terug verwelkom het? Hy het ongetwyfeld weer geliefd en gewaardeer gevoel. Wat dink jy het dit in hulle verhouding teweeggebring?

Hoekom nie mekaar so in Yeshua-liefde groet en behandel nie? ’n Liefdevolle groet kan iemand se lewe vandag seën. Dink aan die geleenthede wat ons het om kinders van Abba Vader op ’n gereelde basis te groet.

Daarom, dink bietjie oor die manier waarop jy ander groet. Benut jy hierdie geleentheid ten volle? Voel ander kinders van Abba Vader kosbaar en dat jy hom of haar waardeer? Voel hy of sy geliefd?

Selfs wanneer julle nie so goed oor die weg kom nie, kan jy die spanning verlig en ander se eiewaarde verhoog deur die manier waarop jy hulle groet – met liefde in Yeshua.

Onthou, liefde is ’n keuse. Kies daarom om die manier waarop jy groet, te verander. Kies om lief te hê. Kies om meer soos Yeshua te wees.

Kom ons bid saam:

Abba Vader, vergewe my norsheid en selfsugtigheid. Ek wil leeg wees van myself. Kom vul my met U Gees. Meer en meer van U. Leer my om lief te hê soos Yeshua – onbaatsugtig. Ek bid dit in Yeshua se Naam, die Seun van YHVH. Amen.